Йӑлана кӗнӗ тӑрӑх, кашни ҫул районта чăваш чĕлхи тата литература вĕрентекенсен уçă урок фестивалӗ иртет. Пуш уйăхĕн 14-мĕшĕнче Аслӑ Чурачăк вăтам шкулӗнче район шайĕнчи «Уçă урок — 2023» XIX-мĕш фестиваль иртрĕ. Фестивале Раççейри Пӗлӳ тата ăс паракан, Чӑваш Республикинчи Телейлĕ ачалăх çулталăкне халалланă.

Фестивалĕн тĕп тĕллевĕ – шкул ачисен вĕренÿ пахалăхне çÿлерех çĕклесси тата вĕрентÿре çĕнĕ мелсемпе, меслетсемпе ĕçлекен вĕрентекенсен ăсталăхĕпе паллашасси. Мероприятие вĕрентекенсем активлă хутшăнчĕç: чĕлхепе тата литературăпа уçă уроксем ирттерчĕç. 4-мĕш класра вĕренекенсем Т.Ю.Ермолаева вĕрентекенпе М.Ухсай çырнă „Услан кайăк юмахне” вуласа тишкерчĕç. „Сахал сăмахпа та нумай калама пулать” урокра Т.А.Шингалова 5-мĕш класс ачисене ваттисен сăмахĕсенчи тăван халăхăн тарăн та пуян ăсĕ, шухăшлавĕ пуррине ăнлантарчĕ. Л.И.Никифорова тата Н.В.Филиппова 6-мĕш класра „И.Я.Яковлев тата Л.Н.Толстой — аслă вĕрентекенсем” бинарлă урокра чăваш тата вырăс халăхĕн аслă вĕрентекенĕсен пурнăç çулĕсемпе ĕçĕ-хĕлне танлаштарнă май стена хаçачĕ кăларчĕç, тишкерсе пĕтĕмлетÿ турĕç. 7-мĕш класра вĕренекенсемпе Н.И.Плеткина ирттернĕ „Пул ăслă, тавçăруллă” вăйă-урокра ыйтусем çине таянса, хатĕрленмесĕр, çыхăнуллă каласа пама хăнăхтарасси тĕп вырăн йышăнчĕ. ”Чăваш чĕлхи-тăван чĕлхе” вăйă арчи урокра Л.П.Абрамовăпа С.Г.Индюкова 8-мĕш класс ачисене тĕрлĕ вăйăсем выляттарса тăван чĕлхене юратса вĕренме хавхалантарчĕç. С.А .Жукова „Кĕсье кĕнеки” ятпа ăсталăх урокĕ кăтартса пачĕ. Тĕрлĕ темăпа, ÿкерчĕксем ÿкерсе сăрлама, словарь ĕçĕсем тума та питĕ меллĕ иккен кĕсье кĕнеки.

Фестиваль Т.В. Макарова (музыка вӗрентекенӗ) хатӗрленӗ пӗчӗк концертпа вӗҫленчӗ. Фестиваль пуриншĕн те усăллă пулчĕ. Килнӗ хӑнасем кӑмӑллӑ юлчӗҫ.